المفاجأة

المفاجأة

ان شاء الله هتم خطوبتي خلال الاسبوع ده بعد تفكير دام اكتر من شهرونصف يعني بعد عناء واللي فيه الخير يقدمه ربنا وعقبال الجميع ان شاء لله اللي لسه لكن اللي حصل ربنا يهنيهم وادعوالي ربنا يبارك فيكم وفي الجميع

استفتــــــــــــــــــــــاء

الموضوع ده لقيته مكتوب في موقع في جوجل فحبيت اشركم معايا واقتبسته عندي عشان تقروه وتشوفوا التعليقات بتاعته اللي هي من خلال زمايل البنت دي وانا سمعت كتير من اصحابي عن كده فشوفوا انتو كمان رايكم ايه؟
انا بجد فى عذاب.....انا اتعرفت على شاب من النت بس هو بجد انسان محترم جدا المهم بعد مااعترفلى بحبه كانت تصرفاته زى الملاك كان كل يوم يتصل بيا الصبح بدرى قبل ماينزل شغله ولو حص بنا زعل يتصل بيا على طول علشان يصالحنى وبعد فترة اتقدملى عريس ولما قولتله قالى انا هكلم اهلى وربنا يسهل وكنت اسعد انسانة فى الدنيا لما قالى انه هينزل يشترى الشقة بس بعد كام يوم حبيبى اتغير ولما حاولت اعرف منه السبب اكتشفت ان باباه مش موافق على جوازنا لانى معرفة نت وقالى ان مش هينفع نكمل مع بعض لانى خايف اقولك نكمل مع بعض ويظلمنى وخايف مانكملش مع بعض يبقى لينا فرصة نتجوز وبصراحة انا قولتله لا انا مش هقدر اسيبك وقمت اتصلت بيه لاننا كنا بنتكلم على النت لقيته بيعيط وماكنش عايز يرد عليا علشان مايسمعش صوتى وانا بعيط وحكالى كل ظروفه ان الدنيا قاسيه اوى عليه وانه انسان مالوش حظ وخلاص اتفقنا انى هستناه بس بجد انا شايفة تصرفاته متغيرة اوى ومش عارفة اعمل ايع انا تعبانة اوى وبحبه بجد اعمل ايه ؟ وهو كدة بيحبنى ولا لا؟ ارجوكم ساعدونى _________________اقسم برب العرش الذى كون الهضاب سأظل احبك حتى ارتدى الابيض وادفن تحت التراب
انتقل الى الاعلى
انا من بلد وهو من بلد تانيه بس احنا الاتنين فى مصر انا بس عايزة اعرف من كلامى عنه بيحبنى ولا لاء؟_________________اقسم برب العرش الذى كون الهضاب سأظل احبك حتى ارتدى الابيض وادفن تحت التراب

بصى يا نور انا هكلمك بصراحه وياريت متزعليش منى لأ الكلام ده هو الصح انا واحد من الناس مش مقتنع بحب النت ازاى انتى تحبى واحد مجرد انك كلمتيه كام يوم على النت ولا تعرفى شكله ولا تعرفى شخصيته ؟ النت ده يا نور بيبقا كله كدب وخداع لو علمتى احصائيه على كميه الصدق على النت هتلاقى ما بين الف واحد عشره بيتكلموا بجد فانا عايزك تعدى وتفكرى مع نفسك .... هل انتى عرفتى هو شكله ايه ( مع ان الجمال جمال الروح ) الراجل مش بالشكل هل انتى واثقه من شخصيته بجد هتلاقى اسئله كتيره اوى انتى مش هتلاقيلها اجابات عندك وده لانك اكيد 100% متعرفيش عنه كل حاجه فياريت ودى نصيحه من اخ خايف عليكى بجد ومتستغربيش ان انا خايف عليكى مع انى معرفكيش ولكن علشان انا عندى اخوات بنات يـــاريت تفكرى كويس وتحاولى تنسى الموضوع ده وانتى لسه صغيره يعنى الحياه لسه ادامك ومسيرك تقابلى الراجل اللى يستاهلك وتستهليه وربنا يوفقك يا نور :wink:_________________«®°·.¸.•°°·.¸¸.•°°·.¸.•°®»with my best wishes«®°·.¸.•°°·.¸¸.•°°·.¸.•°®»
انتقل الى الاعلى
يا (نور) انا عاوز افهمك حاجة واحدة علشان تفهمي انتي حكمنا كويس.. مين قال لك ان أي واحد بيخدع واحدة لازم يكون بيقول لها معلومات عن نفسه غلط؟ انا أعرف أكتر من واحد كانوا (بيمشوا مع البنات) وبيقول لها كل المعلومات عنه ولما يكون مضايق يحكي لها وممكن تقف جنبه كتير ويحكي لها حاجات كتير قوي عن حياته وعن نفسه .. ورغم كل ده لما آجي أسأله بتحبها يقول لي لا.. وانا كنت ببقى مستغرب في الاول بس اكتشفت في الآخر ان الحكاية ان هو بيبقي عاوز يعيش الجو كله للآخر بس.. يعني ممكن يكون بيضحك على نفسه أو (بيعيش القصة) زي ما بيقولوا.. وصورته أكيد هتكون حقيقية .. بالعكس كمان لو كانت مش حقيقية يبقى هو تفكيره غريب أو متعقد من شكله لأان هو عاوزك تحبيه هو مش تحبي واحد هو اللي مألفه من دماغه.. فيه معلومة صغيرة عاوزك تعرفيها كمان يمكن تكون جديدة عليكي.. مش شرط ان اي واحد يكون محترم وعلى خلق وعارف ربنا لازم يكون مبيضحكش على بنات مثلا او معرفش واحدة على الاقل.. وانا شفت أمثلة بنفسي _ والله العظيم _ وكان نفس اللي انتي بتقوليه بيحصل ولما أسأله بتحبها يقول لي لا انا بفكر ازاي اسيبها .. وانا افكر معاه في طريقة علشان يسيبها ولما الطريقة اللي فكرنا فيها تنفع يسيبها بجد.. مش مصدقة طبعا.. عاوزة تفهمي ده بيحصل ازاي؟ القاعدة المتعارف عليها بين الشباب وبعضهم ان اي واحد معرفش بنات قبل كده يبقى _ تقدري تقولي كده _ ملهوش في المواضيع دي.. واللي مالهوش في المواضيع دي بيعتبر ناقصه حاجة طبعا في مجتمع كل الشباب فيه ليهم في المواضيع دي.. لازم لما يقعد مع اصحابه ويقول رأيه في بنت او موقف حصل بين ولد وبنت يكون جرب قبل كده.. ويقول لهم _ علي سبيل الترفع _ : يا جماعة انا ياما ضحكت على بنات قبل كده وعملت اللي بتقولوه ده كتير بس كده غلط مش صح يعني زي ما انتم فاهمين.. طبعا انا مش بتكلم عن حد معين يعني ولا قاعدة عامة .. انا قصدي ان فيه ناس بتعمل كده.. المهم بس ان اي واحد بيعرف بنات ويخدعهم دي مش عيب في حقه وسط اصحابه ولا تخلي واحد صاحبه يزعل منه او يقول ان اخلاقه مش كويسة او ان هو ميعرفش ربنا.. غالبا هيقول: يعني هو فيه حد معرفش بنات قبل كده؟ بس امتي بقي يكون ده عيب في حقه او كده يعتبر مش على خلق؟ لما ياخد الحكاية دي هخوايه ويسيب واحدة ويعرف التانية ويسيب التانية ويعرف التالتة وكده.. وكمان انا لو سألتك نفس السؤال هلاقي ان انا وانتي متفقين ان اي واحد لازم عرف بنات قبل الجواز .. ودايما _ او غالبا _ مش بيكون عرفهم على حب .. حتي لو كان على خلق ويعرف ربنا.. اسألي نفسك انتي: ايه المانع انك تكوني انتي التجربة اللي كانت قبل الجواز؟؟ فكري بوجهة نظر تانية يا (نور) علشان انتي بتسالينا السؤال وعاوزة أجابة محددة مسبقا في بالك وغيرها مش هيعجبك.. الحب يا (نور) زي ما يكون بالظبط واحد بيقول لواحدة ان هو ماسك _ ورا ظهره _ وردة .. وهي مش عارفة لو كان فعلا هو ايده _ اللي ورا ظهره _ فيها ورده وللا لا .. بس بتصدقه لغاية ما تشوف ايده في الآخر أو تقول له وريني الوردة كده؟ اللي بيحب بجد مش هيقول مجرد كلام.. هيقدم لها الوردة على طول.. مهما كانت الصعوبات.. علشان فيه وردة وهو مش هيرمي الوردة دي بعد ما سقاها الفترة دي كلها.. أعتقد ان انتي فهمتيني كده.. اتمني لك كل التوفيق في حياتك القادمة بجد.. وان شاء الله يا ستي يكون رأينا احنا غلط ويكون هو بيحبك بجد بس فيه اي ظروف عنده الفترة دي بالصدفة.. وفي يوم من الايام تلاقيه بيقدم لك الوردة من نفسه.. بس احنا بس بنقول لك متستنيش علشان يمكن يكون مفيش.. اتمني لك السعادة مع قرارك اللي انتي هتاخديه مهما كان.. دمتي

نفرتيتي تقول

انتظروا المفاجأة

في البوست القادم

اتمني دعائكم لي بالحل الصالح والامثل في المفاجاة

لا اله الا الله محمد رسول الله